पातळ पोह्यांचे दडपे पोहे.

साहित्य. :

1. पातळ पोहे पाव किलो,
2. मध्यम आकाराचे २ ते ३ टोमॅटो, 
3. अर्धी वाटी ओलं खोबरं 
4. मध्यम आकाराचे २ कांदे
5. एक लिंबू
6. ५ - ६ हिरवी मिरची 
7. कडी पता, 
8. कोथिंबीर,
9. एक चमचाभर साखर,
10. जिरे,
11. मोहरी,
12. एक चमचा धणे पूड,
13. फोडणीसाठी थोडं तेल,
14. मीठ. 

कृती.   :

• प्रथम पोहे चाळून घ्यावेत, नंतर एका भांड्यात टाकावे. 
• त्यात टोमॅटो बारीक चिरून घालावेत व हलवून घ्यावे आणि किंचित पाणी शिंपडावे आणि झाकण ठेवून दहा-पंधरा मिनिटे ठेवावे. टोमॅटोच्या रसामध्ये ते पोहे चांगले मुरतात. 
• कोथिंबीर चांगली धुऊन घ्यावी सुकल्यानंतर बारीक चिरून ठेवावी. 
• नारळ खावून घ्यावे किंवा किसून घ्यावे. कांदा बारीक चिरून घ्यावा. मिरचीचे तुकडे करून घ्यावेत, लिंबूचा रस एका वाटीत काढून घ्यावा, तो रस त्या पोह्यांमध्ये टाकून घ्यावा.  
• आणि पोहे परत एकदा हलवून घ्यावेत ते सुके आहेत असे वाटले तर किंचित पाणी परत शिंपडावं,
• गॅसवर कढई गरम करत ठेवावे. फोडणीपुरते तेल टाकावे तेल तापलं की त्यात जिरे मोहरी हळद थोडेसे शेंगदाणे कांदा बारीक चिरलेला हे सगळ टाकून घ्यावे तसेच मिरचीचे तुकडे , कढीपत्ता हे पण फोडणीत टाकावे 
• आपल्या आवडीनुसार मिरचीचे प्रमाण कमी अधिक करावे, त्यात एक चमचा साखर घालावी आणि कांदा शिजवून घ्यावा. 
• कांदा शिजून झाला की गॅस बंद करावा त्या कढईमध्ये पातेल्यातले पोहे टाकून घ्यावे चवीनुसार मीठ टाकावे आणि हलवावे , त्यामध्ये खवलेला नारळ कोथिंबीर टाकून परत एकदा हलवून झाकण ठेवावे अशा रीतीने आपले दडपे पोहे खाण्यासाठी तयार झालेत ,

आंबट आणि मध्येच गोड असे मस्त चव येते हे खायला खूप  छान लागतात तुम्ही एकदा जरूर करून बघा!